يابحر ودي نحكيلك اصغالي....!

السلام عليكم

اقدم لكم هذه القصيدةعلى امل ان تنال اعجابكم

يا بحر ودي نحكيلك اصغالي

علي ما جرالي

نبي نفش غلي نشاكيك حالي

*****

البحر:-
ياولد قبل ما تبدا اتخرف

عليك بنتعرف

وان مااهذا شوف غيري اصرف

انتا غير جاي زامق في الدمع اتذرف

مالك ومالي

تره غير خطاني سيبني ف حالي

****


ان كان بي التعرف انا اسمي احميده

وداير اكبيده

غابت وتمن الامي شديده

ولو ترد نبي نعيشها سعيده

وتبقى حلالي

تزعر علي كنك بالصوت العالي

*****
يا بحر نبي نحكيلك اصغيلي

جرحي اشفيلي

علي ريد بعدها تم حاير دليلي

حسبي الله فيها ربي ووكيلي

خذا غيري بدالي

مثيل الحريربدله بخيش بالي
*****
يابحر نبي نشاكيك داي

وعطيني الراي

مرايف عليها نبيها حذاي

تبقى بدر ضاوي تنور سماي

وتطبب اعلالي

وتطفي نار جوا في كنيني تصالي
*****
يابحرنبي تعطيني الحل

علي ريد رحل

مرايف عليها وصبري كمل

ف غيبة ازويلها ركبني علل

وثقلن احمالي

ع الكتوف نين جيت كبيت اشوالي
*****






يابحر ودي قصه معاك نبدا

علي ريد عدا

خلاني ضليل حالي بعده تردى

ودمعي غدير فاض ماحد حده

وما قدرش والي

يوقف ادموعي ف سبا دلالي

اللي غايب وما با دمعي يعده

واسمور الليالي

مذيبل انادي فيك وين يا الغالي

بالك يحن قلبك للصوب اترده

اللي كان جالي

عني كما جثه وفيها الدود مالي

وراه حال غايته القلب حال وده

تعاود قبالي

ويردن معاك الايام الخوالي
*****

يا بحر نبي نحكيلك اصغالي

علي ماجرالي

نبي نفش غللي نشاكيك حالي