نا عارفــّه

قديم موش لي الحق نا عارفه .. امغير عقل خايب عالرماد ادفّه
..
هي معروفة .. مانا لبعضنا يا عليك حسوفه
امغير شي ما تقدر علي نشوفه .. ملاحق سراب اميّتة بنرشفّه
خياب عقل ما نفعت معاه حلوفة .. ولا لجام جابه ولا خيابه كفّه
علي الدار يبرم من سعير ف جوفه .. يلاجي بجمر اللي رقيق الشفّه
والعين حارت واقفة مكتوفة .. و نا بعزم ع الاول نبي نصرفّه
بكاية مقابر ع البكاء ملهوفة .. ويا بال عقلي بالعشم حلفّه
سالت علي صوباً دوي ادفوفه .. لا تو يدوي معاي كفّى ووفّى
بيدي رفعته وشلت عنّه خوفه .. الأول بعيني زفتّه شايفّه
اتقول بالكفن عدت وهي ملفوفة .. وجا اقبالتي سواقها وقفّه
البيضا وشالاته محني كفوفه .. وعدّن كراهب خلفها في زفّة
أحلامي بعدها كلها منسوفة .. ولا افعال سو الحق نا مسلفّه
الحاصل فقدت الغالية العطوفة .. وشايل عيوني للخلا مطرفّه
ابكي وسيلي وردتك مقطوفة .. منك خذوها كل حد في ضفّه
ع الفقد واخذ قست لذع اظروفه .. وكم من انواع امرار نا لاقفّه
..
قديم موش لي الحق نا عارفّه .. امغير عقل خايب ع الرماد أدفّه
..
خذيت قناعة .. من قبل ما يفارق رقيق اصباعه
هو موش لي انقولها لهالساعة .. امغير عقل بأوهامه ادروب رصفّه
حاسب ايطوله ما نواش اخداعه .. مريد ع الأركاب فجرته وما كفّه
لابد ايجي وقته نهار وداعه .. شي بالأقسام وشي راح توفّى
قانع وراضي وصيفتي الوداعة .. امغير في اوقات انحن ناخذ لفّة
انجي وين ما حط القديم كراعه .. وقت النهار انحس نوره طفّه
نكبي علي اركابي نحس اوجاعه .. الخاطر زويل اللي فقدته ايهفّه
سطير جرح مستاسع وفيه فظاعة .. نزازي بناره ليا انحسه غفّة
نعاود علي فراشي انحس ذراعه .. مكان الأوساد اتقول جتني خفّة
قست العذاب وشفت كل أنواعه .. والموجعة للي جهل نوصفّه
..
قديم موش لي الحق نا عارفّه .. امغير عقل خايب عالرماد ادفّه

مشكور على هذا الابداع

مشكوره على طلتك الرائعه