الله يسامحك يلي مشيت .. بشوقي وشاغل أنظاري
في شانك شبابي كليت .. إمغير عـ الشوامت إنواري
في جمر نارك وطيت .. بقدامي وياسك أقداري
في جرتك ياما جريت .. نحسابك تقيمهن أقداري
قدام العرب كان هفيت .. نستاحش يضييقن عذاري
انكان عـ البكا ياما بكيت .. عليك يا مشتت أفكاري
عزيتك ذراعي لويت .. الحق ياخذه منك البارئ
العين بالجفا ليش وديت .. وهي بالمودة إدّاري
معاي بالخطا ليش كافيت .. بكِّيتني وبانن عواري
ماعاد كيفك إلقيت .. في الدنيا إيجلي جظاري
لنقاني فيه إرتزيت .. إعيون من اسمّه إبحاري
كمين ياس بينهن إبقيت .. علي عادلات الظواري
واقضاتني كان غاليت .. علي إيدي إنكوي إجباري
إبكا وجظّرة عمري خديت .. وليلي قرن في نهاري
***
بين البكا والتفاكير .. متقسم الخاطر منامه
خذيت عـ الصغي والتقاهير .. إمروم عليهن إروامة
يانا اللي عايش ضرير .. وصارلي مصار اليتامي
ساقيني عزيز المرار .. ونسيني مقوي عزامه
عزوم مانقدر إندير .. لو كان غير شالن أوهامه
مع زفته للبندير .. من شوره انجيه انتعامه
عزيز تلحقه قلة الخير .. عزل افطامنا من إفطامة
في الجوف داير وهاوير .. مغير عاركن دونه أيامه
العقل حار في التدابير .. جاء ميلهن مشن به اقسامه
وإن جا الليل فيهن إنحير .. قايلاتني تذاكير يامه
مـ اللي عينها تشبه الطير .. شاهين جلِي إكمامه
مـ اللي خذها داير بهير .. وسالف عليها إكلامة
مـ اللي جرحها فيه قورير .. إتجيني إمنين السلامة
مازال فيه جرحي سطير .. والدمع فايض إجمامه
رنين صوتها في التعابير .. يضرب ولايل أنغامه
صاحب الغلا عقله كبير .. وقير من عسل لذة كلامه
يفوت الذهب في المعايير .. غالي وغالي ملامه
وراحن عزيز أيامه
